ចំណាត់ថ្នាក់សណ្ឋាគារ គឺសំដៅបញ្ជាក់អំពីកម្រិតគុណភាពជាក់លាក់នៃសេវាកម្ម សម្ភារៈ គ្រឿងបំពាក់ និងការរៀបចំរបស់សណ្ឋាគារឱ្យបានសមស្របតាមនិយាមអន្ដរជាតិ។ សណ្ឋាគារទាំងអស់ត្រូវមានចំណាត់ថ្នាក់។ ចំណាត់ថ្នាក់សណ្ឋាគារត្រូវមានការស្នើសុំ និងបំពេញបែបបទដោយម្ចាស់សណ្ឋាគារ ឬអ្នកទទួលខុសត្រូវគ្រប់គ្រងសណ្ឋាគារ។ ចំណាត់ថ្នាក់សណ្ឋាគារ ត្រូវបានកំណត់ចាប់ពីកម្រិតអប្បបរិមាថ្នាក់ផ្កាយមួយ(១) រហូតដល់កម្រិតអតិបរិមា ថ្នាក់ផ្កាយប្រាំ(៥) តាមប្រព័ន្ធចំណាត់ថ្នាក់សណ្ឋាគារដូចមានកំណត់ក្នុងឧបសម្ព័ន្ធនៃប្រកាសនេះ។

• ផ្កាយ ១ ៖ ២០០ពិន្ទុ ក្នុងនោះពិន្ទុគ្រឿងសំភារៈបំពាក់ យ៉ាងតិចបំផុតគឺ ៨០
• ផ្កាយ ២ ៖ ២៨០ពិន្ទុ ក្នុងនោះពិន្ទុគ្រឿងសំភារៈបំពាក់ យ៉ាងតិចបំផុតគឺ ១០០
• ផ្កាយ ៣ ៖ ៤០០ពិន្ទុ ក្នុងនោះពិន្ទុសំរាប់សេវាបំរើ យ៉ាងតិចបំផុតគឺ ៥០
• ផ្កាយ ៤ ៖ ៦០០ពិន្ទុ ក្នុងនោះពិន្ទុសំរាប់សេវាបំរើ យ៉ាងតិចបំផុតគឺ ១០០
• ផ្កាយ ៥ ៖ ៨០០ពិន្ទុ ក្នុងនោះពិន្ទុសំរាប់សេវាបំរើ យ៉ាងតិចបំផុតគឺ ១៥០

នីតិវិធីត្រួតពិនិត្យ និងផ្តល់ចំណាត់ថ្នាក់សណ្ឋាគារ គឺជានីតិវិធីបច្ចេកទេសរបស់គណៈកម្មាធិការពិនិត្យ និងវាយតម្លៃផ្តល់ចំណាត់ថ្នាក់សណ្ឋាគារ ប្រើប្រាស់សម្រាប់ត្រួតពិនិត្យ និងវាយតម្លៃផ្តល់ចំណាត់ថ្នាក់សណ្ឋាគារ។ នីតិវិធីត្រួតពិនិត្យ និងផ្តល់ចំណាត់ថ្នាក់សណ្ឋាគារត្រូវបានបែងចែកជា ០៣គឺ៖

• នីតិវិធីទី១៖ នីតិវិធីស្នើសុំចំណាត់ថ្នាក់សណ្ឋាគារឆ្លងតាមការពិគ្រោះយោបល់បច្ចេកទេស
• នីតិវិធីទី២៖ នីតិវិធីស្នើសុំចំណាត់ថ្នាក់សណ្ឋាគារ
• នីតិវិធីទី៣៖ នីតិវិធីព្យួរ ដកហូត បញ្ចុះថ្នាក់ចំណាត់ថ្នាក់សណ្ឋាគារ